വിജയ് ദേവരകൊണ്ട ചിത്രം “കിങ്ഡ”ത്തിന്റെ പ്രദർശനം തമിഴ്നാട്ടിൽ വിലക്കണമെന്ന് പ്രതിഷേധിച്ച് നാം തമിഴർ കക്ഷി (എൻടികെ) പ്രവർത്തകർ. ചിത്രം ശ്രീലങ്കയിലെ തമിഴ്സംഘടനകളെയും തമിഴ് ഈഴത്തിനായുള്ള പോരാട്ടത്തെയും മോശമായി ചിത്രീകരിക്കുന്നുവെന്നാണ് എൻടികെ, എംഡിഎംകെ നേതാക്കൾ പറയുന്നത്. സിനിമയുടെ പ്രദർശനം നിർത്തിയില്ലെങ്കിൽ തിയേറ്ററുകൾ ഉപരോധിക്കുമെന്ന് എൻടികെ നേതാവ് സീമാൻ മുന്നറിയിപ്പ് നൽകിയിട്ടുണ്ട്.
പ്രതിഷേധത്തിന്റെ ഭാഗമായി തമിഴ് നാട്ടിൽ ചിലയിടങ്ങളിൽ ചിത്രത്തിൻറെ പോസ്റ്റർ കീറുകയും, കിങ്ഡം പ്രദർശിപ്പിക്കുന്ന തിയറ്ററുകൾക്കുമുന്നിൽ പാർട്ടി പ്രവർത്തകർ പ്രകടനം നടത്തുകയും ചെയ്തു.
ഗൗതം തിന്നനൂരി സംവിധാനംചെയ്ത സിനിമയുടെ തെലുഗു പതിപ്പും തമിഴിലേക്ക് മൊഴിമാറ്റിയ പതിപ്പും ഓഗസ്റ്റ് ഒന്നുമുതൽ തമിഴ്നാട്ടിൽ പ്രദർശിപ്പിക്കുന്നുണ്ട്. സംസ്ഥാനത്തുനിന്ന് ഇതിനകം ആറുകോടിയോളം രൂപ വരുമാനം നേടിയിട്ടുമുണ്ട്. തെലങ്കാനയിലെ നൈസാമാബാദിൽനിന്നുള്ള സഹോദരൻമാർ വർഷങ്ങൾക്കുശേഷം ശ്രീലങ്കയിൽവെച്ച് കണ്ടുമുട്ടുന്ന കഥയാണ് കിങ്ഡം പറയുന്നത്. ഇതിന്റെ പശ്ചാത്തലത്തിൽ ശ്രീലങ്കയിലെ തമിഴ്സംഘടനകളെ കുറ്റവാളിസംഘങ്ങളെപ്പോലെ ചിത്രീകരിക്കുന്നുവെന്നാണ് വിമർശം.