വീക്കെൻഡ് ബ്ലോക്ബസ്റ്റേഴ്സിൻ്റെ വീക്കെൻഡ് സിനിമാറ്റിക് യൂണിവേഴ്സിലെ മൂന്നാം ചിത്രമായ “ജാംബി”യിലെ നായകനെക്കുറിച്ചുള്ള അപ്ഡേറ്റ് പുറത്തു വിട്ടു. ചിത്രത്തിൽ ‘നിവിൻ പോളി’ നായകനായി എത്തുമെന്നാണ് പുതിയ റിപ്പോർട്ട്. നിവിനിപ്പോൾ മറ്റു സിനിമകളുടെ തിരക്കിലായതിനാൽ നടന്റെ ഡേറ്റിനനുസരിച്ച് ചിത്രത്തിന്റെ ഷൂട്ട് തുടങ്ങാനാണ് അണിയറപ്രവർത്തകരുടെ തീരുമാനം.
ജോർജ് കോര സംവിധാനം ചെയ്യുന്ന ചിത്രം മലയാളത്തിലെ ആദ്യത്തെ സോംബി ചിത്രം ആണെന്നാണ് സൂചന. “ദി അൺഡെഡ് ഹാവ് എ സ്റ്റോറി ടു ടെൽ” എന്നാണ് ചിത്രത്തിന്റെ ടൈറ്റിൽ ടാഗ് ലൈൻ. മിന്നൽ മുരളി, ഡിറ്റക്ടീവ് ഉജ്ജ്വലൻ എന്നീ ചിത്രങ്ങൾക്ക് ശേഷം വീക്കെൻഡ് സിനിമാറ്റിക് യൂണിവേഴ്സിൻ്റെ ഭാഗമായി എത്തുന്ന ചിത്രം നിർമ്മിക്കുന്നത് സോഫിയ പോളാണ്.
ചിത്രത്തിന്റെ ഫസ്റ്റ് ലുക്ക് ടീസർ അണിയറപ്രവർത്തകർ നേരത്തെ പുറത്തുവിട്ടിരുന്നു. ത്രില്ലും ഭയവും ഒരുപോലെ ഇടകലർത്തി അവതരിപ്പിക്കുന്ന ടീസർ പ്രതീക്ഷ നൽകുന്നുണ്ട്. ധ്യാൻ ശ്രീനിവാസൻ നായകനായി എത്തിയ ഇതേ യൂണിവേഴ്സിലെ ചിത്രമായ ഡിറ്റക്റ്റീവ് ഉജ്ജ്വലന്റെ അവസാനം പോസ്റ്റ് ക്രെഡിറ്റ് സീനായി ഈ ടീസർ നേരത്തെ തിയേറ്ററുകളിൽ പ്രദർശിപ്പിച്ചിരുന്നു. ചിത്രം 2026 ൽ റിലീസ് ചെയ്യും.
നന്ദു മനോജ്, ഹരികൃഷ്ണൻ കെ ആർ, സംവിധായകൻ ജോർജ് കോര എന്നിവർ ചേർന്നാണ് ചിത്രം രചിച്ചിരിക്കുന്നത്. തോൽവി എഫ് സി, തിരികെ, ഞണ്ടുകളുടെ നാട്ടിൽ ഒരിടവേള തുടങ്ങിയ സിനിമകളുടെ തിരക്കഥയൊരുക്കിയത് ജോർജ് കോര ആണ്. തോൽവി എഫ് സിയും തിരികെയും സംവിധാനം ചെയ്തതും ജോർജ് കോരയാണ്.