തല്ലുമാലയുടെ മികച്ച വിജയത്തിന് ശേഷം ഖാലിദ് റഹ്മാൻ സംവിധാനം ചെയ്ത ‘ആലപ്പുഴ ജിംഖാന’ വിഷു റിലീസായി തിയേറ്ററുകളിൽ എത്തി വലിയ നേട്ടം നേടുകയാണ്. പ്രേമലുവിന് ശേഷം നസ്ലെൻ നായകനായെത്തുന്ന സിനിമ, നസ്ലെന്റെ കരിയറിലെ മറ്റൊരു സൂപ്പർഹിറ്റായി മാറുകയാണ്. പുതിയ റിപ്പോർട്ടുകൾ പ്രകാരം, റിലീസിനുശേഷം ആദ്യ അഞ്ചുദിവസത്തിനുള്ളിൽ ഇന്ത്യൻ ബോക്സ് ഓഫീസ് കളക്ഷൻ 18.08 കോടി രൂപ പിന്നിട്ടതായി വ്യക്തമാകുന്നു. ഇതിൽ കേരളത്തിൽ നിന്ന് 15.26 കോടിയും, ബാക്കി ഇന്ത്യയിൽ നിന്ന് 2.82 കോടിയും നേടിയതായാണ് റിപ്പോർട്ട്. ആദ്യ ദിവസം കേരളത്തിൽ 2.62 കോടി രൂപ നേടിയ ചിത്രത്തിന്, വിഷു ദിനത്തിൽ 3.41 കോടി രൂപ എന്നതായിരുന്നു ഇതുവരെ നേടിയ ഏറ്റവും ഉയർന്ന കളക്ഷൻ.
മമ്മൂട്ടിയുടെ ‘ബസൂക്ക’യെ റസ്റ്റ് ഓഫ് ഇന്ത്യ കളക്ഷനിൽ ‘ആലപ്പുഴ ജിംഖാന’ മറികടന്നതായും റിപ്പോർട്ടുകൾ പറയുന്നു. പ്രേക്ഷകരിൽ നിന്നും സിനിമയ്ക്ക് എല്ലാ കോണുകളിൽ നിന്നും വലിയ പ്രശംസയുണ്ട്. ഖാലിദ് റഹ്മാന്റെ സംവിധാന മികവും, സ്പോർട്സ് കോമഡി എന്ന ജോണറിനോടുള്ള നീതിയും പ്രേക്ഷകരെ ആകർഷിക്കാൻ സഹായിച്ചു.
പ്ലാൻ ബി മോഷൻ പിക്ചേഴ്സ്യുടെ ബാനറിൽ ഖാലിദ് റഹ്മാൻ, ജോബിൻ ജോർജ്, സമീർ കാരാട്ട്, സുബീഷ് കണ്ണഞ്ചേരി എന്നിവർ ചേർന്നാണ് നിർമാണം. തിരക്കഥ ഖാലിദും ശ്രീനി ശശീന്ദ്രനും ചേർന്നെഴുതി, സംഭാഷണങ്ങൾ രതീഷ് രവി ഒരുക്കിയതാണ്.
നസ്ലെൻ, ഗണപതി, ലുക്ക്മാൻ, അനഘ രവി, സന്ദീപ് പ്രദീപ് എന്നിവർക്കൊപ്പം, ഫ്രാങ്കോ ഫ്രാൻസിസ്, ബേബി ജീൻ, ശിവ ഹരിഹരൻ, ഷോൺ ജോയ്, കാർത്തിക്, നന്ദ നിഷാന്ത്, നോയില ഫ്രാൻസി എന്നിവരും പ്രധാന വേഷങ്ങളിൽ എത്തിയിരുന്നു.