മലയാള സിനിമാലോകത്തേക്ക് ചുവടുറപ്പിച്ച് മറ്റൊരു താരപുത്രി കൂടി. ഖാലിദ് റഹ്മാൻ ചിത്രം ‘ആലപ്പുഴ ജിംഖാനയിലെ നായികമാരിൽ ഒരാളായി എത്തുന്ന നന്ദ നിഷാന്ത് എന്ന പുതുമുഖമാണ് താരം. പുതുമുഖമാണെങ്കിലും നന്ദയെ മലയാളികൾക്കു പറഞ്ഞാൽ അറിയും. നടൻ നിഷാന്ത് സാഗറിൻ്റെ മകളാണ് നന്ദ. അച്ഛന്റെ പാത പിൻതുടർന്ന് അഭിനയരംഗത്തേക്ക് എത്തുകയാണ് നന്ദയും. ‘വിരൽ തൊട്ടാൽ വിരിയും’ എന്ന ഒറ്റ ഗാനത്തിലൂടെ മലയാളികൾക്ക് പ്രിയപ്പെട്ട നടനാണ് നിഷാന്ത് സാഗർ.
സിനിമയിലെ കടന്നു വരവിനെ കുറിച്ച് നന്ദ പ്രതികരിച്ചത് ഇങ്ങനെയാണ് “അച്ഛന്റെ സിനിമകളൊന്നും അങ്ങനെ കാണാറുണ്ടായിരുന്നില്ല എന്നതാണ് സത്യം. സിനിമയെ ഭയങ്കരമായി പിന്തുടരുന്ന ആളുമല്ല. ഡിഗ്രിയിൽ കറങ്ങിത്തിരിഞ്ഞ് അറിയാതെ വിഷ്വൽ കമ്യൂണിക്കേഷനിൽ വന്നുപെട്ടു. അതൊരു ഫിലിം റിലേറ്റഡ് കോഴ്സ് ആണ്. അങ്ങനെ ഡ്രിഗ്രിക്കാണ് കൂടുതൽ സിനിമയെക്കുറിച്ച് പഠിക്കുന്നത്.
സിനിമയുടെ ടെക്നിക്കൽ സൈഡ് അതുകൊണ്ട് കൂടുതൽ അറിയാൻ പറ്റി. സിനിമയിൽ അഭിനയിക്കുന്നതിൽ അച്ഛന് വലിയ സന്തോഷമുണ്ട്.
ഓഡിഷനിലൂടെയാണ് ഈ ചിത്രത്തിൽ തിരഞ്ഞെടുക്കപ്പെടുന്നത്. ഒന്നിൽ നിന്നും ഞാനായി തന്നെ മുന്നോട്ടു വന്നതുകൊണ്ട് അച്ഛന്റെ സ്വാധീനമൊന്നും ഉണ്ടായിരുന്നില്ല. ഈ സിനിമയിൽ അവസരം ലഭിക്കുകയാണെങ്കിൽ അതിലും മികച്ച അരങ്ങേറ്റം ഇല്ലെന്നാണ് അച്ഛൻ പറഞ്ഞത്. ഖാലിദ് റഹ്മാൻ സിനിമയിലൂടെ സിനിമയിലെത്തുക എന്നത് വലിയ ഭാഗ്യം തന്നെയാണ്.”
നായകനായും സ്വഭാവനടനായും പ്രതിനായകനായും മലയാളത്തിൽ തിളങ്ങുന്ന നടനാണ് നിഷാന്ത് സാഗർ. ഏഴുനിലപ്പന്തൽ (1997) എന്ന ചിത്രത്തിലൂടെയായിരുന്നു നിഷാന്ത് സാഗറിന്റെ അരങ്ങേറ്റം. ലോഹിതദാസ് സംവിധാനം ചെയ്ത ‘ജോക്കറി’ൽ ദിലീപിനൊപ്പം അഭിനയിച്ചതോടെയാണ് നിഷാന്ത് സാഗർ ഏറെ ശ്രദ്ധ നേടിയത്. 2008ൽ, സണ്ണി ലിയോണിനൊപ്പം പൈറേറ്റ്സ് ബ്ലഡ് എന്ന ഒരു ഇൻഡോ-അമേരിക്കൻ സിനിമയിലും നിഷാന്ത് സാഗർ അഭിനയിച്ചിരുന്നു. തിളക്കം, ഫാന്റം, പുലിവാൽ കല്യാണം, രസികൻ, തിരക്കഥ, സ്വ ലേ, കാര്യസ്ഥൻ, അണ്ടർ വേൾഡ്, വൺ, ചതുരം, ആർഡിഎക്സ്, ടർബോ, അന്വേഷിപ്പിൻ കണ്ടെത്തും, രേഖാചിത്രം തുടങ്ങിയ നിരവധി ശ്രദ്ധേയ ചിത്രങ്ങളിൽ നിഷാന്ത് സാഗർ വേഷമിട്ടിട്ടുണ്ട്.