മമ്മൂട്ടിയുടെ ഏറ്റവ്വും പുതിയ ചിത്രമായ ബസൂക്കയുടെ ആദ്യ പ്രദർശനത്തെ കുറിച്ചുള്ള ചർച്ചകളാണ് സോഷ്യല് മീഡിയയിൽ വൈറലാകുന്നത്. എമ്പുരാന്റെ കുതിപ്പും വിവാദങ്ങളും സോഷ്യൽ മീഡിയയിൽ നിറഞ്ഞാടുമ്പോഴും മമ്മൂട്ടി ആരാധകർക്ക് പ്രതീക്ഷകൾക്ക് ഒട്ടും കുറവില്ല.
മമ്മൂട്ടി ആരാധകര് ഏറെ പ്രതീക്ഷയോടെ കാത്തിരിക്കുന്ന ചിത്രമാണ് നവാഗതനായ ഡീനോ ഡെന്നീസ് സംവിധാനം ചെയ്യുന്ന ബസൂക്ക. ഏപ്രില് 10ന് രാവിലെ ഒന്പത് മണിക്കാണ് ചിത്രത്തിന്റെ ആദ്യ പ്രദര്ശനം. സോഷ്യല് മീഡിയാ അക്കൗണ്ടുകളിലൂടെയാണ് ഈ വിവരം പുറത്തേക്ക് എത്തിയിട്ടുള്ളത്.
മലയാളത്തിലെ എക്കാലത്തെയും മികച്ച തിരക്കഥ രചയിതാക്കളിലൊരാളായ കലൂർ ഡെന്നിസിന്റെ മകനാണ് ഡീനോ ഡെന്നിസ്. മമ്മൂട്ടിക്കൊപ്പം പ്രശസ്ത തമിഴ് സംവിധായകനും നടനുമായ ഗൗതം വാസുദേവ് മേനോൻ നിർണായക കഥാപാത്രത്തെ അവതരിപ്പിക്കുന്നുണ്ട്. ബെഞ്ചമിൻ ജോഷ്വാ എന്ന കഥാപാത്രമായാണ് ഗൗതം മേനോൻ എത്തുന്നത്.
ചിത്രത്തിൽ സിദ്ധാർത്ഥ് ഭരതൻ, ബാബു ആന്റണി, ഹക്കീം ഷാജഹാൻ, ഭാമ അരുൺ, ഡീൻ ഡെന്നിസ്, സുമിത് നേവൽ, ദിവ്യാ പിള്ള, സ്ഫടികം ജോർജ് എന്നിവരാണ് മറ്റ് പ്രധാന താരങ്ങൾ. കാപ്പ, അന്വേഷിപ്പിൻ കണ്ടെത്തും എന്നിവക്ക് ശേഷം സരിഗമയും തീയേറ്റർ ഓഫ് ഡ്രീംസും ചേർന്ന് നിർമിക്കുന്ന ചിത്രം കൂടിയാണ് ബസൂക്ക.